上季澳職總冠軍布里斯班獅吼（黑衫）繼續沉淪，聯賽5連敗！獅吼之前係威係勢，創下跨季連續36場不敗紀錄，點知喺12月頭輸咗俾FC悉尼後，就一沉不起，今場佢哋作客榜尾嘅黃金海岸聯，成場波都踢得老鼠拉龜，到完場前更輸個12碼，畀對手嘅丹尼爾施維連奴操刀射入，全場輸0:1。踏入12月以嚟，獅吼黑過墨斗，踢幾多場輸足幾多場，真係見唔到佢哋短期內有能力反底。