教育局局長孫明揚上星期證實感染退伍軍人症，住咗幾日瑪麗醫院，前晚趁住平安夜向院方請假，返屋企同仔女乖孫過節；話晒都仲未正式出得院，孫公慶祝完後，噚日凌晨就返咗醫院留醫。孫公嘅新聞秘書話，孫公佢體內嘅病菌已經清得七七八八，但要做埋少少測試先可以出院，最快下月3日返工。
孫太唔見影 疑避開記者
雖然孫公請假出院時聲沙沙，精神一般，但據聞佢噚日都幾精神，瑪麗醫院發言人都話，孫公情況穩定，暫時繼續留醫私家病房。佢仲未出得院，一班記者聖誕節都要繼續喺醫院等候最新消息，但由朝等到傍晚都未見每日嚟探老公嘅孫太出現，聽講噚日孫公架AM車曾經喺瑪麗出現過，唔知係咪孫太為咗避開記者，專登兜路走秘道，唔似前日咁大派朱古力慰勞記者。
除咗孫太，孫公嘅高官好友同樣唔見影；反而噚日入去探病嘅市民，對一班記者相當好奇，唔少人行過時都竊竊私語，好奇到底班記者等緊邊個。