自從鄭嘉穎成為視帝之後，工作真係排山倒海，不過緋聞同是非都隨之而來。前晚嘉穎到屯門出席聖誕倒數活動，同場仲有何韻詩同王菀之，嘉穎打頭陣演出，除咗同fans玩遊戲整蛋糕之外，仲唱咗首張國榮嘅歌《怪你過份美麗》，台下反應不知幾好，全場起哄。
近日有傳聞話嘉穎嘅兩位過氣緋聞女友佘詩曼同周麗淇（Niki）為佢爭風呷醋，當中指阿佘為免Niki翻撻嘉穎，某日喺化妝間怒睥Niki，嘉穎聽到笑話：「寫呢段嘢個記者真係可以做編劇，公司缺乏人才。可信性真係非常低，阿佘出名EQ高，根本就冇可能，真係好好笑。」
林欣彤洩春光
近日傳Niki同富貴男友甩拖？嘉穎冇正面回應，不過佢承認大家喺梁靖琪婚禮上見面有傾偈，並唔係傳聞中冇交流。咁聖誕有冇sms畀阿佘同Niki？嘉穎笑笑口話：「我所有識嘅朋友都有send。」
另外，問到阿詩有冇同容祖兒交換禮物？阿詩話：「大家都冇送，以前我會好積極搞party，但家冇晒精力。」林欣彤（Mag）表演時唔小心露打底褲，問到有冇送禮畀緋聞男友羅孝勇？Mag話：「唔使，唔需要，講心ok。」
