噚日係拆禮物日，車路士領隊波亞斯就拆到份相當啱心水嘅禮物。老闆阿巴莫域治開張1.5億鎊（約18億港元）嘅支票畀佢喺1月增兵。有咁大份「筆直」，除咗據講已傾掂數嘅加利卡希爾之外，拿玻里雙雄卡雲尼同咸錫都係車仔嘅目標。
英超踢咗近半季，家形勢睇，今屆冠軍都不出兩支曼市球隊，而車路士始終都係喺第3第4位浮沉，阿巴希望可以拉番近同雙曼嘅距離。今年初油王使咗7,500萬鎊買咗費蘭度托利斯同埋大衛雷斯，天價換嚟一個唔記得咗點入波嘅前鋒同埋一個成日亂咁嚟嘅計時炸彈，結果自然俾人笑到面黃。不過阿巴冇打算放棄，決定趁1月轉會市場重開大灑金錢，翻新陣容，據講波亞斯有成億半鎊去買人。
睇中拿玻里孖寶
如無意外車仔喺轉會市場重開後第一單收購，就係以700萬鎊由保頓簽英格蘭中堅加利卡希爾，後者同保頓仲有半年約，所以價錢先咁平。車仔1月亦會有安歷卡離隊，杜奧巴又會去踢非洲國家盃，所以中前場都要快手加強實力。車仔已經鎖定咗頭兩號目標，同樣效力拿玻里嘅前鋒卡雲尼同埋中場咸錫，兩個球員身價分別係5,000萬同3,000萬鎊。車仔出年2月喺歐聯16強嘅對手正係拿玻里，要對手將兩大主力賣畀你？相信唔出天價都幾難成事。除此之外，車仔亦打算買多個翼鋒，亦睇中祖雲達斯嘅卡錫，不過呢位塞爾維亞國腳要成2,000萬鎊。
其實車仔一直喺1月都好少出手買人，自從油王入主後，04年由查爾頓買柏加但都係投閒置散多。除咗05年嘅查洛錫外，亦都冇一個1月新兵可以幫球隊即時贏到英超錦標。始終再出色嘅球員都要時間融入新球隊，車仔出年1月就算真係拎過億鎊嚟買人，有冇成效真係有所保留。綜合倫敦外電