民望落後緊嘅唐英年，趁噚日聖誕黃金檔期去西貢宣傳。唐唐識享受街知巷聞，佢帶埋老婆同四個仔女山長水遠入到西貢，第一件事就係去糖水舖「滿記」醫肚，食飽之後，就同西貢區議會主席吳仕福、西貢鄉事委員會副主席邱全去海鮮街出巡見街坊。
西貢街坊好熱情，一見唐唐就捉住佢搭膊頭影相，有街坊仲送上自家製白飯魚乾。有遊艇出租公司老闆就同唐唐呻，話自從地質公園「升呢」變世界級後，多咗好多遊客，但就唔夠遊艇泊位，唐唐一口應承話會諗諗點搞。
不過，有西貢街坊當面鬧唐唐政綱冇料到，冇提過環保，建議佢學吓台灣總統馬英九，半年內收起晒街上面嘅垃圾桶，等人自覺將垃圾帶返屋企分類。早前強調自己好包容意見嘅唐唐卻竟然問番街坊︰「你覺得香港有冇可能（做到）？」街坊即時贈佢一句：「畀夠兩年好未？你任期有五年㗎。」