朱門酒肉臭，路有凍死骨。當債務危機仲瀰漫住成個歐洲，唔知幾時擴散到英國之際，最近英國啲鐵路工人因為要求更好待遇而醞釀罷工，但最高人工嘅英格蘭球員朗尼一於少理，臨近聖誕買完馬，又再使近50,000鎊起個馬房畀佢老婆高蓮隻馬仔，又要扮上流，個仔Kai仔得兩歲就帶佢去學打高爾夫球。
兩歲仔學高爾夫
朗尼喺上季扭計成功，續約曼聯之後坐擁英格蘭球員最高人工，一個星期搵成25萬鎊（約300萬港元）。啲錢嚟得太易，自然買嘢都唔使睇銀碼。朗尼同高蓮兩公婆各自買咗隻馬，加埋使咗17萬鎊，朗尼隻競賽馬就交畀隊友奧雲個馬房度打理，而老婆隻馬仔就留嚟「自用」，已經打咗價用48,000鎊喺佢哋豪宅度起個馬房仔養馬，據講仲會為Kai仔買多隻馬，等佢第日大個可以一齊騎。
奢華品味生活陸續有嚟，朗尼靠踢波發達，不過佢兩公婆認為Kai仔都係適合玩高尚啲嘅運動，決定要同老虎活士睇齊，兩歲就開始學打高爾夫球。朗尼會為Kai仔搵個職業級數教練，亦已為佢準備咗成套高球裝備，兼有個繡咗佢個名嘅球袋。
翻查朗尼一家嘅使錢習慣絕對唔嘢少，朗尼買車成癮，大大話話有近十部車，估計佢過去5年買車都用咗過百萬鎊。上個月Kai仔生日玩農場主題又使50,000鎊；高蓮買衫買珠寶首飾就更加唔會手軟，呢個聖誕唔使講又會盡情購物。
曼聯球星聖誕送暖
好在朗尼都有關心下弱勢社群，一班曼聯球星喺星期五去咗曼徹斯特一家醫院探訪病童，除朗尼外，包括啱啱下巴受重創嘅菲爾鍾斯都有出席。至於領隊費格遜就代表球會捐咗50萬鎊去一個肺癌慈善基金，費爵爺嘅雙親都因肺癌過身，佢都話呢次活動好有意義。