中軟國際（354）喺兩蚊邊打咗3個月底，係時候兜翻轉。中軟係祖國領先IT企業，好多海內外巨擘及祖國政府機關，都係集團客戶。又早輪集團引入聯想（992）母企旗下KeenInsight，做主要股東，講客戶優勢，講股東實力，中軟彈出。睇業績，中軟集團2011年半年度（6月底止），唔計非經營性虧損，實際經營溢利上到1.4億銀人仔，增長69%，靚仔到爆。就當全年度起個孖到2.8億銀人仔，實際PE得8倍幾單位數。再講，阿爺「十二．五」規劃中，對軟件行業亦好照顧，按規劃，到咗2015年底，行業收入可望達到4萬億銀人仔，中軟長賺長有。呢轉喺兩蚊收集中軟，以2011年度12倍PE做目標，中軟要見2.83元，回報率過40%。
昊天有炒賣焦點
昊天能源（474）9月宣佈出售烏海市蒙港權益，售價18.3億銀，煤礦潛在變現，大過昊天市值13億銀。所以，要密切留意EGM表決及落實出售嘅進展，呢壇製作，有機會成為昊天中期一個炒賣焦點。Beforethat，昊天喺3年低位，現價（0.455元）嘅NAV折讓，高達53%，折讓大，博短打升20%到0.53元，未有耐到NAV0.96元。
錢雋