個個出機都玩Uncharted、無雙，玩埋同一樣嘢，信奉同一種打機方式。Vita新機推出，護航Game有一籮咁多，不過真正玩到Vita前後Touch機能嘅，暫時睇嚟玩得最盡嘅都係呢隻《塊魂Vita》，搓圓㩒扁滾嚟滾去，Thiscityisrolling，youknow？
文：阿洛
用盡新機能
老老實實，啱啱打完PS3嘅《Uncharted3》，又玩完高清無雙無限重複系列、《MarvelVSCapcom》，又用開大掣睇開大電視，點解我要拎住部手提機望住個五吋芒嚟玩先？就因為可以前後Touch，搓圓㩒扁，如果要揀Game幫部機開齋，《塊魂Vita》呢類隨時玩隨時停嘅輕鬆遊戲，仲用晒前後輕觸機能就最啱玩。唔似得其他護航遊戲，新機開箱最大樂趣可能係喺標題畫面輕觸按Start掣，《塊魂Vita》完全採用Vita最大賣點——前TouchScreen後TouchPad嚟觸控操作玩遊戲，玩開同系列遊戲嘅都知，遊戲玩法就係將主角前嘅塊團越黐越多雜物，越滾越大，所以採用輕觸控制王子滾嚟滾去，一定別有一番風味。
兩指伸縮掃背
用輕觸操控，隨時令遊戲性大增。用手指輕掃正面觸控屏幕，就可以控制團塊移動速度、方向，而衝刺同跳躍動作都係靠隻手指掃嚟掃去操作。而重點就係放喺機背用嚟掃背嘅手指，只要左右手食指放喺TouchPad度向內推或向外拉，前面畫面內嘅團塊就會變長或變扁，有啲地方係一定要拉長先可以去到，亦可以變闊嚟橫掃大量物件，體驗伸縮自在的愛。順帶一提，《塊魂Vita》嘅主題曲，由日本老牌歌手松崎茂幸演唱，配合埋國王喺度扭身扭勢，惡搞味道濃郁。
Profile
主機：PSVita
廠商：NAMCOBANDAIGames
類型：動作
遊戲人數：1人
