內地明星同韓國明星嘅排場同氣勢一向都好犀利，關仁就真係聽過唔少明星嚇親人嘅要求，佢哋多數都要求拖幾個化妝同整頭助手現身，因為想保證自己一出現就好有氣勢，實行輸人唔輸陣。
逼名牌代交稅
好似內地一線女星「叮飯」，佢出入長期要帶埋阿媽，所以要搵佢做嘢，主辦單位畀佢嘅星級服務同使費就自然都要買一送一，條數一變二，不過叮飯話晒有知名度，好多名牌都惟有照畀。不過，聽講叮飯最近嘅要求越來越多，家佢搭飛機去外地做嘢，要求阿媽、助手、化妝等六、七個人都一齊坐頭等，淨係機票費都好重皮，佢仲試過叫啲名牌幫佢交埋稅，咁人哋又點頂得順呢？
Textby關仁