馮仁昭四圍超：
全家出動血拼　張燊悅忽變大眼 - 馮仁昭

張燊悅一家四口噚日出動去到銅鑼灣，佢哋無懼滿街嘅內地自由人爭路，為聽日嘅聖誕節添置物品同買餸煮飯。傍晚6點幾，素顏嘅張燊悅一拖一抱兩位囡囡會合剛剛放工嘅老公，去到時代廣場地庫較少內地人嘅CitySuper購物。
兩公婆好有默契商量咗兩分鐘之後，就分道揚鑣各帶一位小朋友去購買，大概買咗一分鐘已滿載而歸。不過張燊悅似乎意猶未盡，將手上物品交低畀老公去排隊畀錢之後，佢就急急趕去補買，不過最後都係空手而回。當一家四口畀完錢，兩公婆繼續分工合作，老公負責攞物品上車，孭住細女嘅張燊悅就攞住購物嘅單據去換免費泊車票，可謂知慳識儉。

警覺性甚高

張燊悅始終出身娛樂圈，雖已為人妻變成師奶，不過警覺性依然頗高，佢冇耐就發現記者喺度影緊相，佢對眼亦由原先望住囡囡時只有5毫子咁大，一下子撐大到成個5蚊銀咁大，效果恍如戴咗大眼仔一樣。之後佢落到去地庫停車場會合老公，仲刻意搵張紙巾遮住細女個樣唔畀佢上鏡。