【本報訊】今晚平安夜，又是青少年放縱狂歡的一夜。臨近聖誕，警方加強打擊油尖旺蒲點，上月尾展開「拯救者」行動掃蕩俗稱「妹場」的樓上酒吧，帶走逾270名「未夠秤」仔妹。然而《蘋果》記者發現，有尖沙嘴「妹場」在警方打擊下依然旺場，滿場短裙少女成為吸引男客的生招牌，就算警方查牌，一眾仔妹依然被探員「放生」，「拯救者」竟成「放生者」。
記者：馮詩媚、司徒韋桐
拯救者行動於上月25及26日連續兩日突擊搜查89間夜場，帶走113名未成年男女，至本月18日，行動再帶走152名未成年男女。行動目的是打擊未成年男女流連酒吧，再將個案轉交社工跟進。根據法例，任何人不可賣酒予18歲以下人士，而領有酒牌場所均不能容許18歲以下人士飲酒，違者可判罰款5萬及監禁6個月。
尖沙嘴漆咸道南嘉芙中心亦在掃蕩之列，該大廈連地庫共18層，大部份為酒吧，警方上月底拯救者行動中，便在該大廈帶走40多名未成年男女。大廈中層一間以「會員俱樂部」為名經營的樓上吧，每逢周五、周六晚，客人多得要預先訂枱，更有DJ打碟，場中空間成小舞池，入場費約200多元「任飲」，是區內出了名的「妹場」。
警叫負責人「搞掂佢」
記者於本月9日晚上11時入場，仍未到旺場時間，場內僅約30多名顧客，大部份貌似未成年。帶普通話口音的女負責人「燕子」與記者搭訕說：「12點幾開始旺，好多仔妹鍾意嚟玩，如果唔book就無枱㗎。」她揚言如果收到風將有警方查牌，就不會容許未成年男女進入，「如果唔查牌嘅話就一定爆場……我哋呢度好多妹妹仔，好多都未夠秤。」
至深夜11時半，十多名便衣探員上門查牌，又逐一查青少年身份證。有探員盤問四名妹，她們稱是首次幫襯，又說只是等朋友，探員回應：「第一次嚟玩唔去樓上樓下，又會識嚟呢度？」探員最後將身份證全部發還，未帶走任何人。
15分鐘後，探員走到吧台要求見持牌人，燕子說持牌人病倒不在場，探員即質問：「係病咗定係驚咗我哋呀？知唔知有啲唔應該響度嘅人響度？」探員又說：「半個鐘頭之後我哋會再返嚟，我要見到持牌人響度，你同我搞掂佢！」即收隊離場。
「未夠秤嘅落去一陣先」
探員一走，其中一名負責招攬客人的「燈頭」即大呼：「未夠秤嘅落去一陣先。」場內十多名仔妹即離座步出酒吧，搭電梯到樓下暫避風頭。記者隨「燈頭」離開，對方說：「落去照顧吓班客，佢哋未夠秤，一陣先可以再返嚟，差人查多一次就唔會再查，今晚繼續有得玩。」
17日晚，記者再到上址，發現全場爆滿，一進門就已見到數名打扮性感的少女歡迎客人及收入場費，但記者留意到她們之後會「通場飛」，身份儼如知客或「拳手」。除了「飲呀」、各種歡呼聲此起彼落外，記者更耳聞有男性向少女大呼「錫啖先」、目睹有男女雙眼失焦，疑吸了毒品。
記者凌晨4時許離開，不少仔妹仍在樓下聚集，有人更在路邊「劏白鶴」，醜態百出，據說爭女打架更是家常便飯，故長期有警車泊在附近戒備。記者翌日才得悉，當晚警方曾在區內展開拯救者行動，但嘉芙中心卻沒被掃場。