歐洲球壇一花獨放，英超仍保持「年終無休」傳統，加開聖誕快車，尚幸今年聖誕前夕及正日均休戰，各位球哥毋須睇波賀節，且勸諸君趁此與摯愛親朋共慶，所思在遠道，珍惜眼前人，方顯佳節大義，今日為劉曉波先生以言獲罪，重判監禁11載之3周年，在此謹向其伉儷遙遙致意！
回頭論英超大勢，以油元打造之曼城依然領先同市宿敵紅魔2分，尾隨各隊不但被拋離，更須兼顧歐洲盃賽，迎頭趕上，談何容易？儘管早前曼市雙雄齊齊緣盡歐聯，全市愁雲慘霧，但有失亦有得，今屆英超桂冠，花落曼徹斯特，幾可篤定，問題僅在於藍衣戰士能否出頭露角：反壓同市剋星而已？
其實，紅魔之所以稱霸英超，一時無兩，乃是領隊老費當年痛定思痛，致力扶掖隊中新秀使然，1992年遭列斯聯後來居上，捧走最後一屆英甲，對手就是依賴法國猛將簡東拿，帶領隊中小將馳騁。於是，老費逐重金挖角，將其羅致旗下，由之掛帥擔綱，提攜傑斯、碧咸、史高斯、尼維利昆仲……等「七小福」，配合也是新秀的鋼門舒米高，終能雄視本土，問鼎歐洲！然而，今日紅魔，已無帥材如「老簡」，朗尼雖好，終究綠葉一張，並無牡丹驚艷！今季費格遜銳意改革，重用一眾新秀，然缺乏運籌帷幄之重鎮，哪能不事倍功半？反而宿敵曼城，則銳意以本傷人，隊中好手如雲，後備力量充沛，聯賽乃是長途之旅，板櫈深自然佔優，成為真命天子也！
新年尚未到，先開烏鴉嘴，紅魔擁躉，多多包涵！
文：長毛