十二月十九日，賓架Ｐ來電，問左丁山會唔會去參加唐英年造勢大會，左丁山話無資格，冇收到邀請函，不過即使收到亦唔會去，咁多大人物喺度，做茄喱啡少一個唔少，賓架Ｐ話一定要去，因為董事局成員會出席，佢唔能夠脫隊。銀行界人物支持唐英年，不是秘密，畢竟唐英年做商人時，家族公司已是滙豐渣打呢類老牌銀行嘅大客，後來佢做商務局長、財政司長，而香港係國際金融中心，更與金融界有公事上緊密往來，同所有銀行家都有聯繫。相反地，梁振英係測量師，由仲量行至梁振英測量師行至戴德梁行，最主要嘅生意來源就係地產公司集團，平時業務往來最多嘅就係地產界人士，唔係銀行家。兩人之中，你話邊個同地產商相熟？
睇電視，唐英年之造勢大會冇梁振英宣佈參選大會咁似大騷，一位專欄作家（如無記錯，好似係鄧藹霖，如果記錯，謹此致歉）就寫過，梁振英大騷之策劃及場面調度之嚴謹，一切盡在計算中，緊要過香港電台每年主辦嘅「十大中文金曲」，夠晒Pro。唐英年呢，物似主人型，平平實實，高潮欠奉，全無驚喜，而一切可預測得到，屬於不造作，一切坦蕩蕩，你話我儍，我請你食燒鵝之類。蔡子強話梁振英令佢怕，大概唐英年會令佢瞓得着覺。口才好好多嘅任志剛講到：「唐唐人厚道，胸襟廣闊，是真君子型最佳人選，相反，若然事事針鋒相對，如狼似虎，以牙還牙，會令市民感到不寒而慄，擔心被秋後算帳。」
以前嘅任總，現在嘅任教授素來口才便給，出口成章，先後發表兩次挺唐之言，借用陶傑點評方式可以講得話係有層有次，有骨有刺。去年諾貝爾經濟學獎戴蒙德教授於十二月五日到中大演講，之後中大在沙田凱悅酒店請吃晚飯，鍾逸傑爵士坐在戴蒙德教授身旁，任教授坐在鍾爵士之旁，左丁山坐在任教授之旁，於是有機會問佢：「你對被記者包圍，講得咁流利，是否事先有底稿，臨場背書？」任先生笑曰：「我唔識背稿嘅，一背就會背錯，我次次都係對記者即興發言㗎，邊有時間事先寫好底稿吖！」