聖誕節本應玩餐飽，港台今年聖誕、除夕卻忙於大掃除，掃走兩件烽煙名嘴周融同吳志森，從此乾乾淨淨。港台噚日率先掃走《千禧年代》嘅「銅紫荊」周融。等多6日，吳志森亦都會「被封咪」。周融老馬有火，臨別勁寸多年拍檔梁家永分析力唔夠班，尚有5日命嘅吳志森，準備下周大事回顧，同聽眾分享如何挑動「左腦」神經。
清晨5點幾起身，6點幾開車，7點鐘踩入廣播道，8點鐘開咪，10點鐘鬆人。12年來，周融每周五天主持《千禧年代》，遲到過一次，即刻見報，「嗰次係宣佈申請廣播處長之後嗰日」。遲到為咗避嫌，因為周融唔想同梁家永一齊討論佢申請處長單嘢。當日梁家永獨撐大局，下周一起，呢個獨腳戲畫面天天見。
勁寸梁家永分析力弱
「同梁家永仲係朋友！」周融噚日係咁樣講㗎，但講呢句之前，周融忍唔住，吞唔落俾梁家永寸佢表現「ok啦」呢啖氣，「梁家永嘅長處係將複雜事情，簡單表述出來，但弱點係分析唔係好得，佢日後應該請多啲嘉賓為佢分析件事，畀市民睇得清楚件事囉！」
由此可見，做傳媒，最緊要有團淋唔熄嘅火。周融最後一日開咪，一聽到大學迎新營教大學生申請公屋，即時扯火，劈頭狂鬧，「有冇搞錯呀！年輕人呢啲叫做有着數攞到盡，個社會病咗呀！」
名嘴「寸嘴」，所以不愁出路。周融稱鄭大班曾搵佢過數碼台開咪，不過佢婉拒，「都做咗12年啦，唔係要做電台做到死為止，人生有好多唔同階段。我同佢講，如果我再開咪，我會同佢做節目，但我唔打算再開咪。」
港台係是非之地，但要台前漂亮。當日「杯酒釋兵權」嘅港台高層戴健文同港台中文台台長周偉材，噚日同周融握手講再見。握手過後，周融告別官台，誓不回來。
吳志森：唔要安慰獎
8年前，董去曾上，香港人真係儍到以為煲呔會「創新天」，但8年後，sorry，天依舊灰。吳志森話，8年前，聽眾打電話上嚟，鬧到青筋暴現，仲曉得勞氣。8年後，空氣好似不再熱辣辣，「因為市民都心灰。佢哋以為政府轉咗，會有啲轉變，原來唔係。」
對於「有冇唔捨得？」呢個老套問題，吳志森回應較周融感性得多。「咁梗係有唔捨得，每日做節目，我都要留意新聞，搜集資料，呢個已成為生活一部份。」
太多街坊、太多網民、太多港台人替他不值，也替《自由風自由Phone》唔值。「因為當年港台講明，烽煙唔想畀港台公務員主持，由外人嚟做，呢個係當年嘅構思。」
每周一次講幾句唔吸引
要求吳志森離開《自由風自由Phone》後，港台送咗個「安慰獎」畀佢，請佢每周一次、寄居在某個節目嘅部份時段繼續論政。吳志森形容咁樣係「應酬佢」，所以唔去領獎，「意義唔大，我未必接受，因為咁樣做節目，質和量都唔夠。」
同劉佩瓊鬧交，吳志森原來唔係好enjoy，平衡聲音唔好聽，「總之記住，有唔同意見唔緊要。」佢最享受同搞文化、辦教育嘅黃英琦做節目，讚賞對方對事情分析入微，烽煙節目其實「唔出煙」，一樣可以好好聽。
mailto:[email protected]
