CCup咪神徐淑敏（Suki）產後上圍更見豐滿，近日復出主持無綫飲食節目《甜姐兒》，鏡頭前的她低胸賣甜品，惹師奶觀眾反感，Suki昨日聞言即大講唔好意思。鏡頭以外，她日前以密實人妻打扮跟老公帶着一對囡囡遊迪士尼享親子樂，同時也為奶奶賀壽。
兩女之母咪神徐淑敏，今年9月產下幼女Renee，坐月收身後，她上月隨即孖糖妹和丁樂鍶主持飲食節目《甜姐兒》，Suki在三女中身材最勁爆，為了吸引觀眾食慾，咪神頻頻低胸打扮出鏡，攝影師又大特寫Suki的胸部，宅男歡迎，卻惹師奶投訴，網民即力撐咪神衣着平常。
對於衣着暴露令師奶反感，Suki昨日在電話中說：「唔好意思，其實啲衫係以前着開，可能我肥咗少少，電視同影相出嚟好唔同，我睇電視都有啲尷尬，我會注意吓。」Suki日前剛完成《甜姐兒》錄影工作，她樂得輕鬆享親子樂，潮媽日前帶着家人到迪士尼樂園耍樂，為奶奶賀壽，同時幼女Renee也剛滿3個月，三代同堂嫲孫同時慶祝。
囡囡驚玩木馬
家人給Suki無限正能量，所以她也樂於回饋，當天Suki和老公黃浩帶着長女Vianna大玩機動遊戲，兩母女更坐旋轉木馬，得Vianna笑呵呵，Suki說：「Vianna最初有啲驚，係咁叫我陪坐，於是我哋就一齊坐，玩完佢又話要再玩。」
其後一家人又往看4Dshow，三口子戴上立體眼鏡拍照，組成黑超家庭，Suki大爆囡囡睇騷趣事說：「佢睇得好投入，見到有卡通人物彈出嚟，佢都嚇咗一跳，但走時猛同我講玩得好開心。」
採訪：比華利
