近日幾乎日日拜票、落區嘅唐唐，真係忙到氣咳，今日終於可以休息吓，做啲「課外活動」，唔係令佢有感情缺失嗰啲，而係佢電玩展。
亞洲遊戲展請唐唐今日下晝去參觀，呢個毒男勝地、宅男「麥加」，有最新款電玩、勁game，當然唔少得波濤洶湧嘅gamegirl，唐唐選擇出席呢個「課外活動」，八方覺得佢開始掌握到民意，至於有咩收穫，今日入場後先知。
主辦單位強調請唐唐係因為佢支持創意工作，亦想畀機會佢親身睇睇呢門行業幾咁興旺，佢哋都有請CY，不過回覆稱無時間；何俊仁、馮檢基就未回覆。
唐唐噚日佢同埋太太一齊去老人中心，向老人家講耶穌，講聖誕節起源故事，指聖誕節源自一個BB出世嗰日，出世嗰日有三位高人，見到一個帶領佢嘅星，去到嗰度見到耶穌，結果呢……，唐唐自己都接唔到落去，之後就話，對於好多商家來講，聖誕係一個黃金檔期，因為聖誕節，年輕人同屋企人、朋友出街去玩，「你哋啲屋企人有冇嚟探你哋呀？」（下刪1,000字）。噚日部份長者有腦退化症，不過唐唐情況似乎更差。