蘋機會：AGS開鑼首賣PSVita　人機撐爆

天氣回凉，但踩落灣仔會展AGS（亞洲遊戲展），氣氛卻異常高漲！全因整個會場瀰漫住一股「撐爆」氣氛，唔係因為超豐滿版「不知火舞」現身，又或Sony砌出一幅PSVita嘅氣勢Wall，而係PSVita行貨在港首賣！

記者：陳國輝、許福合
攝影：黃子偉

過百人排隊搶機

每部機微賺$200

行貨未發售前，其實較早抵港嘅水貨已熱爆Game場，炒價更比原來貴多$1,400！但如果你諗住行貨仲有得炒，可能要失望而回。據Game舖店長鐵人話，行機貨源充裕，每間舖可分到幾百部，即係話機價難以炒起；而回收價方面就比正價多出$200，以AGS現場每人僅限買一部計算，幾乎無肉食！至於PSV水貨，網站price.com.hk昨日已降價至3G版$2,779，跟行貨淨機價無分別，Game場直頭話早就清晒貨。

■現場PSV有限定購買數量，額滿即止。

■有十幾款PSV遊戲供選購。

PSVita發售詳情

SCE在AGS期間每天都有預備一定數量供機迷選購，所以想買到機就記得早到排隊喇！

設《街霸×鐵拳》擂台

想率先玩新作，場內除咗有PSVita，仲有幾隻明年先推出嘅PS3遊戲！而最矚目肯定係3月6日先正式面世嘅《街霸×鐵拳》，現場設有巨型電視，更邀請咗台灣以及日本嘅高手跟參加者比試，自問玩《街霸》由細打到大，而且信心爆晒棚，不妨搵佢哋挑機！至於RPG遊戲，仲有Capcom大作《ResidentEvil:OperationRacconCity》，今集主攻Online齊齊打，而你控制嘅主角仲有機會變成喪屍，咁有新意，入到會場梗要試埋啦！