名嘴開咪最後一擊，都忍唔住要鬧爆大學生申請公屋，樹仁大學最新出版《仁聞報》都有報道呢個現象，訪問咗「香港末日博士」羅家聰，向大學生傳授置業之道，因為「輪公屋好核突」。
大學生畢業搵到一萬蚊左右算好彩，置業應該係妄想，羅家聰勸大學生唔使急，因為香港樓市大約16年一個周期，唔會永遠有上無落，所以大家唔使擔心要瞓街；呢兩年畢業嘅大學生，如果真係想置業，應該好好計劃儲蓄、投資，有嚿錢喺手，第日先可以把握入市機會。
羅家聰又預測三年內樓價較現時跌四成甚至五成，既然睇跌，佢認為後生仔唔應該去申請公屋，應專注工作，做好份工，比掛住買樓更加實際。