一蛋未平一蛋又起，布力般流浪嘅中堅史葛丹恩勇戰爆蛋要唞個幾月，原來喺西甲一樣有爆蛋男。畢爾包前鋒迪馬高斯喺上場西甲上演另一幕男人最痛，佢同丹恩一樣咁堅，就算受重創都唔甘心做「縮縮北行鳥」，負傷忍痛超過一個鐘完成埋場波先去處理自己傷勢。我求大俠淨係聽到都覺得赤赤痛，真係不得不封迪馬高斯做「鐵蛋猛男」。
迪馬高斯至少唞半個月
足球員傷膝傷大髀就見得多，重要部位受創都係唔多常見，仲要慘事成雙，一日連嚟兩單。布力般流浪後衞史葛丹恩喺上星期六場英超勇戰受傷，事後先知原來係男人重要部位受傷，但都堅持到踢完場比賽先去治理，家要養傷6星期。
至於另一單聽落更毛骨悚然慘劇就喺上星期六場西甲聯賽發生，畢爾包喺主場以2:1擊敗薩拉戈薩，前鋒迪馬高斯喺上半場中段俾對手鏟中下體，雖然痛到飛起，但冇諗過要退下火線，仲踢足90分鐘。唔知好彩定唔好彩，畢爾包主場波褲係黑色，如果教練見到佢一褲都係，睇怕都唔會畀佢繼續踢落去啩。事後迪馬高斯去醫院，因為陰囊撕裂加埋尿道末端都有傷，結果要縫25針，嗰晚成晚都痛到瞓唔到，家至少要休息半個月。
迪馬高斯為球隊犧性咁大都重算有回報，畢爾包就係靠佢嘅助攻攞到奠定勝局一球。迪馬高斯講番呢單嘢話：「中咗招之後我都知係受咗傷，到中場休息嗰陣我發現情況都幾嚴重，不過我覺得自己頂得住所以繼續踢。係男人嘅話應該都想像到嗰度被踢中會有幾痛。睇怕未來一年我都會係隊友茶餘飯後嘅取笑對象咯，家只係希望盡快傷癒。」難得仲識攞自己嚟講笑，迪馬高斯你真係堅。
港隊隊醫：好易流血不止
不過咁樣死忍爛忍係咪好？香港代表隊隊醫張維醫生雖然以「超人」嚟形容迪馬高斯，但就唔認同佢嘅做法：「如果我係在場隊醫，就一定要佢即刻離場去醫院，因為生殖器官的血液十分豐盛，好易流血不止，加上他着嘅波衫、波褲都唔多乾淨，好易引起併發症。」浸大體育系副教授雷雄德就話：「有啲尿液帶有毒素，若入到體內其他部位會死得人，佢嘅情況應該緊急處理，唔好繼續比賽。」