教育局長孫公喺瑪麗留院一星期，康復得七七八八，有消息指最快今日可以返屋企過聖誕。孫太噚日探病時話孫公精神好好，就算唔可以正式出院，都希望醫生畀佢放假返屋企過節。孫公胃口唔錯，前日食完海鮮蒸乳酪，孫太噚日又外賣雲吞麪畀老公嘆。
孫公有病在身，好多人認為佢應該退休，孫太卻話支持佢做完餘下半年任期。孫太承認一家人兩星期前去過番禺長隆旅遊度假區，但冇做spa亦唔無游水，所以唔知孫公喺邊度中招。CY噚日下晝去探孫公，逗留15分鐘離開，「大家係老友兼舊同事，佢復原得好快，大家可以放心」。至於孫公應否提早退休，佢話留返孫公好番先講。廉政專員湯顯明噚日都有上瑪麗。唐唐則打電話問候孫公，事後話孫公有幾聲咳，可能要留院多觀察幾日。