何傲兒噚日化身春麗，同胸降香港嘅台灣「電玩三正妹」馬友蓉、辛明員、曾妍希喺灣仔會展出席亞洲遊戲展，本地薑何傲兒包到冚，即時被重口味台灣正妹搶鏡，「八字飛釘」馬友蓉以HCup身材震撼全場，「SM思琦」辛明員以缽仔糕僭建上圍，搞到上圍變成長方形。「人妖妍希」有個靚名曾妍希，但戴上粉紅短假髮嘅佢就顯得不倫不類。
三人性感過人，搞到何傲兒無力招架，幸好佢有家姐何傲芝帶挈，令佢喺現場被追住訪問，提到家姐同阮兆祥嘅緋聞，佢話：「家姐好慘、好無奈，因為同祥仔係好朋友，佢都知祥仔有女友，所以點會追家姐？佢最開心係獲封女神。」
祥仔帶挈傲芝
此外，祥仔前晚同王祖藍、李思捷等喺將軍澳電視城錄影《勁歌金曲》，祥仔首度開腔否認緋聞，佢話心情冇受影響，仲好得戚咁話：「以為今年會輸畀祖藍同思捷，佢哋之前都有封面，家我都有。仲有活動搞手竟然咁快就搵我哋一齊出騷㖭。」
