牽牛：奴域斯基上季幫小馬首嘗總冠軍，仲攞埋總決賽MVP，最強PF冇異議啦！
利司基：佢攻強守弱，最強之矛一定係佢，但係overall最強我唔會揀佢。
仙道彬：唔係鄧肯都唔識呀？講最強，點輪到德國佬？
牽牛：仲講鄧肯呢啲老不死？
金鍀：我覺得奴域斯基籃底較弱，籃板又少，淨係外圍射波多，仲算唔算叫傳統大前鋒？
利司基：LarryBird都係半個大前鋒，都成日走出外圍射波㗎，冇咩傳唔傳統嘅。
牽牛：同意，奴域斯基強在非傳統，一個7呎高佬射3分，問你點守！
仙道彬：金糍就中肯啦。奴域斯基始終防守差，假如小馬冇真達拿，佢攞鬼到總冠軍。
金鍀：冇咗真達拿，唔好講奴域斯基，連傑特都搵唔到人交波囉！
利司基：係睇就梗係睇A史杜達米亞啦，攻守都得，又係力量型，今年一定要睇實佢。
仙道彬：單講爆發力，A米真係冇人能擋，當年太陽對馬刺，鄧肯foul佢都foul唔切。
牽牛：講防守，A米咪又係差唔多0防守能力。
利司基：奴域斯基籃板能力同防守唔夠好，鄧肯又老，A米算最好㗎啦，唔通Bosh咩？
牽牛：講潛質，比歷克格芬都好勁呀，吓吓大力入樽，起碼贏個勢。
仙道彬：比歷克格芬防守都有潛質，不過驚佢再傷。
利司基：今年都好似冇咩問題，應該ok嘅，不過佢要改善吓啲中投就真，嘢嘢鏟入去始終唔係辦法。
金鍀：格芬咁搏，擺明都係贏長約嘆世界，不過以佢爆炸力，加埋多啲助攻，絕對係新一代大前鋒之選。
仙道彬：真係懷念鄧肯03年總決賽差啲「四雙」，俱往矣……
利司基：今季大前鋒都有奴域斯基、鄧肯同加尼特搏多季，其實今季睇老將都幾有劇力。
牽牛：我就繼續瞓身支持小馬同奴域斯基博多次總冠軍，睇吓點啦！