目前智能手提電話有價，特別係部「唉瘋四」二手市場仲好搶手，所以新聞都出現唔少呢類搶電話報道。不過有時就未必要搶咁低手，好似大婆台有位甘草「黑菇」佢都趕時髦用部唉瘋四，有日約咗班太太團去茶樓飲茶，佢就順手將部電話放喺枱面。佢一路食就一路見個侍應生不停幫佢換碟同執嘢，好嘞到飲完茶走到門口就發現自己唔記得攞部電話走，轉頭返到去已經搵唔返，前後唔到一分鐘。黑菇事後諗返就越覺得個侍應有問題，佢執嘢同時不停將部電話推埋一邊，仲借意搵啲碗碟遮住佢，就係博你一時睇唔到唔為意，佢就有機可乘。黑菇明知冇得拗就惟有經一事長一智以後部電話唔放上枱囉，真係財不可以露眼。
撰文：關仁