利物浦前鋒蘇亞雷斯喺10月「雙紅會」對曼聯時，涉嫌種族歧視叫紅魔左閘艾拉做「黑仔」（西班牙文：Negrito）。足總喺禮拜二判佢「行為不檢」同「人身攻擊」罪成，重罰停賽8場。無論係砌生豬肉定判罰過重，紅軍再冇埋蘇亞雷斯，要爭盃同爭前4就更加難，杜格利殊真係嬲爆！
阿蘇被重判停8場之餘，仲要罰4萬鎊（約48萬港元）。利物浦當然㷫過火屎，出公開聲明插英足總擺明「砌生豬肉」：「我們認為足總在見蘇亞雷斯前，已經存心判罰他。」阿蘇都有喺自己個twitter回應：「對於我同我屋企人，今日係困難、痛苦嘅一日，好多謝所有人嘅支持，我會繼續努力！」紅軍官網聲明補充，話阿蘇嘅爺爺係黑人，之前又係出名多種族球隊阿積士嘅隊長，點會種族歧視。
泰利種族歧視被起訴
阿蘇，困難、痛苦又點只你呢？紅軍有14日時間考慮上訴，如果維持原判，阿蘇就冇得喺聯賽盃4強上陣。紅軍家要贏聯賽已經好難，唯一可以爭嘅盃就係英聯盃。利記1月喺英聯盃要硬撼曼城，少咗阿蘇，杜格利殊真係頭都大埋。紅軍早排先有中場盧卡斯收咧，隊長謝拉特遲遲未復出，杜帥排陣認真頭痕。
利記呼寃其實都有理，因為兩個月嚟，都冇乜實質證據話阿蘇出口傷人，全憑艾拉一己之言，就連其他曼聯球員都冇話聽到啲乜嘢。但係英國球員工會行政總監泰萊就話判決冇問題：「獨立委員會一定有真憑實據先判佢有罪嘅，今次判決證明咗英超唔容許種族歧視！」足總呢次重判，唔多唔少都有殺雞儆猴用意，有心打擊球場種族歧視問題。咁睇涉及另一單種族歧視嘅車路士中堅泰利，星期三更被正式起訴，明年2月出庭。
叫艾拉「黑仔」都惹禍
阿蘇就算真係有叫艾拉「黑仔」，都未必真係有心歧視佢；因為喺南美，「黑仔」呢個稱呼可以話周街都聽到，而佢祖國烏拉圭啲傳媒，都話英格蘭足總嘅判決虛偽、懶正直。如果睇番烏拉圭球員嘅花名，唔難理解烏國傳媒會咁火滾。
好似佢哋贏1950年世界盃嘅隊長華利拿（ObdulioVarela），佢外號「黑仔老闆」（ElNegroJefe），唔通真係歧視佢膚色咩？現役烏拉圭國腳彭利拿，個花名更加係叫馬騮（ElMono）啦！
