曼聯球星如雲，連馬主都一大籮；上至費格遜，下至奧雲同退咗休嘅史高斯、畢特等都係馬主，朗尼兩公婆一向使錢唔手軟，周一去奧雲個競賽馬房行一轉，就花咗10萬鎊（約121萬港元）幫襯奧雲買咗一對周歲馬，榮升馬主，希望喺馬場一樣咁威。
兩公婆當互送聖誕禮物
朗尼同老婆高蓮星期一拍住拖咁去到奧雲喺柴郡投資嘅牧場兼馬房參觀，睇睇吓就shopping癮發作，結果無端端做埋馬主；馬房發言人講：「我只可以講朗尼夫婦已經落實買咗競賽馬，但唔可以透露更多細節。」據英國傳媒報道，朗尼同高蓮各買一隻周歲馬，好似聖誕禮物咁互送，認真溫馨；朗尼愛駒就命名Tomway，紀念朗尼父親Thomas，高蓮嗰隻就未諗名，但兩人就諗好綵衣顏色，用粉紅色同白色；朗尼對馬仔期望好高，希望明年開始出賽，甚至角逐6月皇家雅士各馬場嘅兩歲大賽，現時就交畀馬房另一揸弗人、練馬師達斯甘比訓練。
其實奧雲呢個馬房都唔嘢少，畢特、史高斯、活基治都有馬交畀呢個馬房養，奧雲就一隻馬每年收番20,000鎊練習費。今次賣周歲馬畀朗尼，就收番佢10萬鎊，雖然好似好貴，不過以周薪20萬鎊嘅朗尼嚟講，都只不過3、4日人工啫。
奧雲識途老「馬」有景轟
不過我求大俠心地唔好，奧雲賭馬養馬咁多年，新馬係龍定蟲，相信好少走漏眼，如果隻馬有贏到級際賽嘅實力，奧雲打死都唔會賣啦。奧雲今次賣馬畀朗尼，一係隻馬唔多叻，等遲啲又可以昆過朗尼買過隻新。正面啲睇，朗尼已經係曼聯大佬，平平哋賣隻靚馬畀佢，等佢過吓拉頭馬癮，隨時同費Sir美言幾句，奧雲傷勢好番，可能連正選都有得做！
另外，曼聯上下出席MUTV聖誕節目中，大玩好似獎門人「大電視」遊戲，朗尼唔識死扮費Sir向碧咸飛砵事件，畀隊友傑斯及莊尼伊雲斯估字，好彩費Sir都仲笑笑口，如果唔係嬲嬲哋飛多次朗尼，佢就知死。
