朋友I入養和醫院做手術，朋友S去探病，見到入口一帶，人頭湧湧，又有電子板打出「全院滿座」四個大字，仲以為自己入咗戲院。
本港私家醫院現時日日爆棚，病房床位供不應求，真係要祈禱自己冇病，否則唔知可以入到邊間醫院？香港目前所有醫院都係九七之前落成啟用嘅，回歸十四年半，特區竟然冇一間新醫院，諗落都幾驚。上星期三，林奮強嘅「黃金五十」發表第二份報告，比較香港與紐約、倫敦、新加坡之分別與競爭對策；遲啲佢與九位八十後、九十後研究員會發表一份香港醫療研究報告，由一位庇理羅士─李寶椿─達茅夫畢業嘅八十後女尖子主打。林奮強話：「睇佢搵到嘅數字與實況，我愈諗愈驚！」驚乜嘢呀？擔心年老之後，有病入唔到醫院囉。林奮強今年五十歲，如此年紀嘅男士約有六十萬，加埋女士，五十歲人口有百餘萬，二十年後，佢地會係七十歲，出入醫院嘅機率可能與出入戲院嘅機率相同，但九七至今十五年，香港起唔到一間新醫院，以後二十年又如何？從開發醫院土地、批地、諮詢區議會、向城規會申請，再計埋地區人士反對（有N種理由，時興話阻住景觀、製造噪音及交通擠塞），甚至司法覆核等等，要有十年時間先至可以建造一間新醫院。兩年前特區話撥六幅地皮興建新醫院，進行成點？投標條件與要求都未講妥呀！
林奮強話香港有大把錢，用一千億元建造新醫院、新大學、新學校、開發土地與公屋，全無財政問題，全世界羨慕不已，偏偏有人要求派錢，咋一聲就派咗二百幾億元，香港所得到嘅，究竟是甚麼？木宰羊。
既有錢，有沒有土地？林奮強話有，只係冇共識與決心啫，大嶼山赤鱲角機場有大地皮曬緊太陽，可興建一千萬平方呎樓面，酒店醫院商場以至專科產婦醫院皆可容納，以解供應不足之急。點解特區政府唔推動，唔策劃呢？或者秘而不宣呢？我們不知道。香港目前顯現硬件不足嘅情況，導致供求失衡，逼高通脹，新特首非正視不可。