今年拆禮物日（26號）在下周一，英超賽會慌死蝕章，加開了近年少見的聖誕前快車期；兵薄者來到「快車第二回」望仍可撐得住，今次博富咸細場浸紅魔，賀球會剛錄得紀錄性盈利。
大會可以兵薄，細會也可以賺大錢，足球場上也可以怪誕連篇。阿仙奴屬前者，富咸屬於後者；不過阿仙奴的兵薄在於竟然有2個門將及5個後衞一齊入傷兵營，這個聖誕真冇運。另一倫敦蚊型球會富咸就唔同，上周中雖然歐霸盃慘烈出局，但其實今年仲有曼市雙雄過嚟齊爭飯食，早早拜拜，集中火力攻國內賽事好過；剛戰聯賽氣走保頓，再宣佈上季錄得破紀錄逾6,000萬港元盈利，每場入座率高達98%，經濟不景下，數據算係好靚仔嘞，乜怨氣都消晒啦。
老班主阿法耶茲龍顏大悅，下個目標要將小屋球場擴建至可坐30,000人，踢得開心球會又賺到錢，玩呢間西倫敦細會，過癮程度點會輸蝕畀車仔同阿仙奴；小弟去親倫敦都會去撐富咸，貪實有飛賣嘛。
今夜對手曼聯，相反因市況不佳，去新加坡上市望集資6億鎊夢暫難圓，莫財又傷兵唔少，其中冇咗尼曼查維迪，今夜喺小屋個窄場踢真係好有危機；翻查近季富咸拆禮物日比賽前聯賽俱不敗，包括兩季前3:0氣走曼聯，入波嘅梅菲、森莫亞同杜夫，到家仲踢緊。細會入到啲實而不華好貨色，真係可以長玩長有。
下次見報（26/12）
文：蘋果波神
今日重心推介
熱選：富咸(下)
冷選：富咸勝2:1(13),和2:2(14)