羅文（籮記）02年因肝癌離世，佢嘅家姐譚文玉同細妹譚明玉5年前決定將超過3千幾件籮記嘅物品捐出，由今日起至下年7月30日，去到沙田香港文化博物館就可以睇到呢位樂壇一代巨星着過嘅歌衫，拎過嘅獎座，甚至演唱會海報、剪報等藏品。
噚日籮記兩個姊妹，仲有白雪仙、關菊英等一班生前好朋友出席「獅子山下．掌聲響起．羅文」展覽會開幕儀式，放喺展覽正中間嘅孔雀羽毛大袍，就係96年「羅文的光輝舞台」告別演唱會時着過，另一件金色珠片斗篷，喺91年憑住《小李飛刀》拎第14屆十大中文金曲金針獎時着過，都係好珍貴。
遺產幫補家計
譚文玉話：「我覺得由博物館去保存係最適合。」籮記離開咗近10年，譚文玉話間中都會掛住細佬。至於留低幾多遺產，譚文玉只係話喺廣州生活，唔使用好多錢，但的確遺產對以後生活幫助好大，就算生前籮記都有照顧家人。
