宅錄：諸葛紫岐　冷霧蒸走黑眼圈

踏入寒冬，相對濕度下降，皮膚乾巴巴，有人甚至乾到流鼻血。要改善此狀況不妨在家中添部放濕機，識得揀納米噴濕的產品，甚至能在家日日做Facial，天天水潤示人，仲邊有人話你Dry！

記者：張文蕙
攝影：伍慶泉
Model：Zoe

客廳篇
乾水斷電　環保又安全

放濕機大致分兩種，傳統是用熱力令水份蒸發，後來市面又推出冷霧式的，由於溫度低，小朋友觸及亦不怕、較安全。Jusco方面指出，用暖霧作放濕，對於有鼻敏感或氣管病的患者會較舒適。
選用室內放濕機，容量較大的適合置於大廳，消費者委員會指出，3-6公升已可放濕約10小時，選用大型放濕機可揀用獨立儲水器的，加水時較方便，亦防止兒童打翻。一般十零度氣溫下，室內相對濕度30%-50%是最舒適，選機時可找一些能調校放霧強度、甚至顯示濕度的，就更能慳電地保濕。的骰機仔較適用於房間，通常放濕3-4小時，多配有夜燈；不過揀貨要揀乾水斷電的，以免睡着了，放濕機還在乾燒。

■入水超過水線位，好易滾瀉！

■獨立儲水器能防止兒童打翻。

■底盤有去水功能的，能防止貯水形成細菌。

■能調校放霧強度較慳電。

■室內放濕機水珠較大，植物放在旁很快濕透一片。

美容篇
冷霧+納米　皮膚易吸收

韓國OregonScientific的納米美容專家——Tae-gonKIM稱：「普通放濕機，主力是平衡室內濕度，所以水分子較大顆亦無問題；用於美容蒸面，必須將水分子打散成納米大小，才最有效穿越毛孔帶至皮膚底層。」所以霧水越厲害並不代表越有效，霧水越細緻才越好！馬上搵嚟KIM研製——納米活性煥膚儀，俾名模諸葛紫岐（Marie）試玩：「噴在面上時感覺軟綿綿，冷霧又可收縮毛孔，從前用過一些熱霧形式的，在面上形成大水滴甚至流到頸項，治標不治本，納米放濕效果就持久多了。」
Marie講起扮靚就停唔到口，話俾小記聽冷霧機還可幫助面部微絲血管收縮、減少紅腫：「唔夠瞓時蒸一蒸，眼仔嘅浮腫、黑眼圈好快無晒！」佢又提醒各姐妹，坊間一些蒸面機，噴來噴去都係一條直線，要用塊面嚟就位，用完頸都梗埋，所以選用圓嘴效果會較佳。

■圓形噴嘴方便霧氣噴到整個面部。

清潔篇
用消毒劑　隨時死人!

早前南韓有報道，指廿多名小孩及孕婦因錯誤使用放濕機，而令肺部纖維化而死亡！KIM指出，他們主要是將消毒劑放入放濕機中，吸入而引致死亡。
冷霧放濕機的確會把水中的微生物及礦物質從水缸發放，有機會令室內的塵埃增加，而用加熱方式的暖霧是不會放出大量雜質，所以用冷霧更應多清潔水缸，不過只需利用蒸餾水已可，而室內濕度超過50%，就不應再放濕免滋生細菌。KIM又提醒，大部份的放濕機均不可加入礦泉水（硬水），硬水雖對人體無害，但裏面的礦物及離子，會對機件的金屬部件構成傷害。