利司基：湖人後衞拜恩地位無可取替，但佢年紀漸大，係時候交棒？
金得：萊爾被國內譽為「黃曼巴」（YellowMamba），可惜佢做傷膝青年，要退休，邊有人可以接捧？唉！
牽牛：講交捧，當年拜恩都叫做MJ接班人，起初佢寸寸貢，我都好唔like佢，但睇住佢大，開始有番啲領袖風範，唔講得鍾意，但NBA最強得分後衞，捨佢其誰。
仙道彬：論實力，拜恩確係勁，論勤力更加勁，啱啱練波射86球入67球，勁到呢！
利司基：呢個當然，上季輸畀熱火後，當晚喺人哋球場練咗個半鐘波，你話佢做show都好，我覺得呢啲先叫專業。
金得：係，拜恩嘅「666」魔鬼訓練，唔係人人做到，獲迪又已經年近30歲，唔通得分後衞呢個位真係青黃不接？
仙道彬：連「白拜恩」真路比利都已經34歲，得分後衞越來越少，因為大部份都變晒得分控球後衞。
牽牛：新一輩嚟講，我對勇士孖寶艾利斯同史堤芬居里最有好感，一個鏟得一個射得，兩個夾得埋，勇士唔講得笑。
利司基：但咁多代教練只有老尼爾遜叫勁，今季馬克積遜真係唔知功力有幾多。
仙道彬：我細細個就睇史堤芬居里老竇戴爾居里打波，佢喺黃蜂都打得吓，估唔到個仔仲勁。
牽牛：勇士真係慘，打一兩季好波，勁人就離開，之前有韋伯、阿蘭拿斯，又睇吓keep唔keep到呢對孖寶。
金得：史堤芬居里太瘦，好似大風一吹就唔見咗，本來我睇好帝王嘅T伊雲斯，但佢喺封館期變咗肥仔，令人欷歔。
利司基：勇士攻強守弱，要入季後賽真係要加強防守先。
牽牛：勇士一向都係好睇唔好食㗎啦！講番湖人，佢哋簽唔到CP3，奧當又走埋，Kobe冇好幫手，仲有冇總冠軍希望？