一代「金王」胡漢輝長子胡經緯，噚日向母校美國柏克萊加州大學捐贈1500萬美元，大概1.17億港銀，該校藝術博物館現址將會冠名「胡漢輝樓」，以紀念「金王」對社會嘅貢獻。
捐贈逾億港銀
唔經唔覺，胡漢輝離世都超過廿年，記得佢嘅人可能唔多。
胡經緯話，柏克萊加州大學建築學院係佢事業起步點，畢業後佢仲為藝術博物館擔任建築師。
佢話一直以父親為榜樣，希望藉住呢次冠名，等新一代能夠更了解佢父親嘅貢獻同成就，成就父親遺訓：「盡己所能，回饋社會」。
美國柏克萊加州大學藝術博物館，1970年正式對外開放，係美國大學規模最大、展品數量最多嘅藝術博物館之一，被譽為美國海灣地區「文化地標」。