D留言很好玩：「你成日話兩個候選人揀唔落手，等我考吓你──如果你係『如花』，必須響兩個之中揀一個『十二少』，你點揀？」
真係考起。不過去問米，睇吓如花佢點揀啦：──
「仲駛問？我梗係揀唐十二少啦，佢家底厚大抽鎖匙又靚仔，成日飲咗門官茶咁，唱嘢飲酒開煙局就夠疏肝啦。佢都冇嘢煩，萬大事後面成棚人幫佢打點，竹織鴨冇心肝，拈花惹草難免㗎嘞，不過我地煙花女子唔望大紅花轎入門咯，正所謂『老舉眾人妻，人客水流柴』，但求埋街食井水有個依靠。星爺話齋，家陣揀『溫心老契』唧，又唔係揀特首，駛乜咁高要求？就算話殉情餵佢食鴉片，怕且儍吓儍吓都肯嘅──不過佢好命，我死佢唔死，收尾仲娶埋表妹㖭。佢地Wearetomorrow，我就Iamyesterday，紅牌阿姑都識少少番話㗎。我睇化嘞，死心嘞。
至於梁十二少，我諗佢冇咁易暈浪囉。佢精甩辮又點肯殉情吖？一個屈尾十走去中聯辦告我，冚晒成個石塘咀都似。
我係自己身，唔係事頭婆身噃，點都好過你地香港人啦──揀錯咗，咪怨自己命苦，望第世咯。我扯嘞，唔駛掛住我。」