兩位讀者來電郵講梁振英與唐英年，一位JoJo話好贊同本欄所言，一位女士S挺唐，來郵節錄如下：
「如果他認識術數就知道香港接下來會差幾年，怎麼樣的年運就出怎麼樣的領袖，所以對應應該有一個差的人當選，而當時此人卻被眾人認為當選一定是好的。
唐英年當選，必差四年，梁振英當選，一半半，可能非常好也可能變壞（李光耀式統治）。
但世界在變，香港在做，台灣在看。」
咦，講到術數揀特首，係另一回事噃，以前「蘋果」寫出唐英年八字，專家讚好，認為係富貴命。梁振英條命都幾好，但只知出生年月日，不知時辰，難以比較，呢啲言論曾被人批評為導人迷信，選特首係應該從經驗能力、溝通能力、管治經驗、未來政綱各方面嚟揀嘅，唔係講子平、紫微斗數、鐵板神數！
但呢位讀者S揀特首，係根據術數噃，我地點知道未來幾年香港運程係點呀？上個月崇基校友易經專家鍾博士回港，曾在崇基向校友講壬辰運程，青姐唔係校友，特登叫左丁山撲飛去聽，之後約埋鍾博士在喜來登天寶閣吃午飯（順便一提，此閣點心十分好，香芒焗飯非常夠味道），左丁山膽粗粗向佢請教，鍾博士話來年係會冇咁好，五黃入東南，主有疫災，大家小心則過（想唔到前幾日已發現禽流感）。至於特首邊個會有機會，鍾博士話未有梁生八字，不敢置評，但睇過唐生八字之後，佢話：「唐生命好，機會甚大。」每年最遲出版而又最厚嘅李居明壬辰年運程書，仲更加肯定：唐生做硬特首，梁生欠官運！此乃李居明之術數「狠批」，讀者S可與佢理論吓。
呢啲事本來想收埋唔想寫嘅，以免被人鬧，但讀者S既然要講術數，只好講多兩句。至於話如梁振英當選，香港可能非常好，也可能更壞（李光耀式統治），一般人會幾怕怕，香港人情願人均GDP產值低過新加坡，都唔想有一位李光耀式人物管治香港，更何況，梁振英怎與李光耀相比呀？相信佢自己都唔敢。更怕未來特首學李光耀不成，卻學懂了操控社會！
不少人對唐英年觀感來自電視，但據一啲報紙老總講（佢地嘅報紙亦有寫），唐英年與佢地私底下談話，比較生動活潑流利，與在公眾場合表現完全不同。既然如此，唔怪得佢在公務員及選委之中，親和力甚強，人緣甚好了。