「體操王子」李寧可能自小接受凌空訓練，所以唔慣「腳踏實地」，自從08京奧做空中飛人之後，去年9月高調搞地產，之後又高調捧明星、搵林志玲做代言人，結果李寧（2331）股價仍然「高」不了，跌到一仆一碌。
僅向美傳媒發放消息
噚日李寧一改高調嘅作風，鬼鬼祟祟宣佈進軍美國電子銷售市場，而且呢單消息只係通知咗美國嘅傳媒。
李寧發言人解釋，佢哋今次唔係鬼祟，只係因為宣傳重點放喺美國，加上今次eCommerce只係探索形式，仲有，李寧今次只係合資公司嘅小股東，按例毋須向外公佈，所以亦只向美國傳媒發新聞稿。
華華唔明，李寧如果睇好呢瓣業務，應該大肆宣傳，冇理由收收埋埋。
難怪有內地分析員都話，李寧連喺自己地頭都未搞得好，家仲走去美國搞網銷，其實都幾令投資者擔心。
李華華
mailto:[email protected]