利司基：最強對最強！杜蘭特對勒邦占士，邊個先係最強小前鋒？
牽牛：我鍾意書包仔，起碼夠純情！
金鍀：最強只有一個，我都選擇杜蘭特，睇占士好似有啲力不從心。
利司基：我都揀杜蘭特，占士第4節實在係潛水！
仙道彬：以上季嚟睇，占士都仲好過杜蘭特少少，雖則我都唔like佢，但佢嘅防守勁過杜蘭特太多。
牽牛：講真球場內，勒邦占士擁有鋼鐵身軀，成架坦克車咁，mark佢都好難；不過佢場外太寸嘴，搞到失晒分。
仙道彬：佢咪同你一樣囉，可能叻人把口都臭啲！
利司基：最唔鍾意佢搞個咩《TheDecision》嘅show，去熱火咪去熱火，使咩諸多造作？而且KD35技術全面，比LBJ只會橫衝直撞好好多。
牽牛：當年佢喺超音速出道，又浪射又一條柴咁，我都唔太睇好佢。
金鍀：杜蘭特當年被稱為「年輕版麥基迪」，由佢奪得分王已可證明。佢帶領賽前唔被睇好嘅美國隊，贏世錦賽，都算係好過占士嘅證據啦！
仙道彬：T-Mac唔傷就有得揮！
利司基：熱火鬥雷霆，一定好好睇。
牽牛：常規賽就有機會，季後賽雷霆再對小馬，一樣冇運行。
仙道彬：邊個冇運行先？卡達呀？
牽牛：雷霆一日有韋斯卜克在陣，小馬真係未驚過。
仙道彬：最尾咪又係輸畀馬刺。
牽牛：馬刺入到季後賽先算啦！
金鍀：小馬冇咗真達拿，雷霆真係唔使驚，講番杜蘭特，如果加多啲背籃進攻，就更全面，占士都話會多打背籃攻。:(
利司基：LBJ背籃咪盞搞到內線塞車，佢都係練好啲外投同改善自己穩定度低嘅問題先啦。
牽牛：大帝係就係好全面，但就太心多，上季仲想做埋控球後衞㖭，我寧願佢專心打切入分球好過。
金鍀：但如果占士繼續贏唔到總冠軍，最強都只係得啖笑。