2012年仲未到，但睇嚟香港大型比賽命認真麻麻，繼網球及環南中單車賽外，又有另一單長命賽無疾而終，今次就輪到香港有唔少「粉絲」嘅中國女排（圖），不過就唔關贊助事。事緣明年撞正7月底嘅倫奧，國際排聯兩周前決定將世界女排大獎賽由原來嘅8月提前至6月8號展開，但咁啱紅館無期，香港排聯惟有放棄一屆。呢個93年開始舉辦嘅大賽，除咗03年沙士停過一次外，香港差唔多年年都有份主辦。不過，中國女排「粉絲」唔使擔心，因為香港排聯正計劃喺大獎賽前邀請出名嗰幾隊來港獻技，包括中國女排，若成功嘅話，可能仲飲到頭啖湯㖭。