上海申花班主朱駿，一向畀球迷吹水唔抹嘴形象，不過家就真係威番次，繼之前落實簽入車路士前鋒安歷卡後，前富咸嘅法國籍領隊泰簡拿，亦都落實加盟申花，出任教練。睇埋連法國傳媒都話，「魔獸」杜奧巴料跟隨安歷卡步伐，由車仔加盟申花，組成呢個法語3人幫，成事機會都越嚟越濃。
56歲嘅泰簡拿周日晚喺上海某酒店同上海申花管理層，正式簽約同會見傳媒；雖然雙方冇正式公佈合約條款，不過申花董事周軍就話，泰簡拿合約暫時為一季，如果明年取得中超冠軍，申花就有優先續約權，薪酬方面，周軍冇正面回應，只話250萬歐元（2,500萬港元）年薪係好接近嘅數字。
泰簡拿想了解中國文化
法國籍嘅泰簡拿威水史，相信好多球迷都熟，佢同柏天尼、費南迪斯、居里斯等合稱法國香檳中場，93年已經開始教練生涯，教過里昂、摩納哥等國內勁旅，幫摩納哥贏法甲聯賽冠軍之餘，都算係亨利同查斯古特嘅恩師，之後轉到英超教富咸。首次東來搵食，泰簡拿就話唔係只為錢，佢講：「如果我為錢，英國、土耳其都更有好offer，我認為今次到中國，是一個精采同特別機會，去了解中國文化。」
人生路不熟，好彩泰簡拿都有同鄉安歷卡照應，安歷卡出名臭馬，泰簡拿就淡定咁講：「我喜歡有性格障礙嘅球員，因為代表佢哋對比賽認真積極。」由泰簡拿領軍嘅申花，睇嚟擴軍仲繼續有嚟，車路士另一前鋒杜奧巴，接受法國足球電視節目Telefoot訪問時，坦白承認正同申花傾緊轉會談判，杜奧巴都操流利法語，佢加盟申花，其實同安歷卡及泰簡拿冇溝通問題。不過呢位科特迪瓦隊長暫時仲希望留英超踢埋呢一季，先考慮離開。
阿馬利做杜奧巴後備
好彩申花仲有後備人選，就係祖雲達斯嘅前鋒阿馬利；阿馬利已經畀祖記棄用，今季未入過波，申花傳用3年500萬歐元除稅後年薪合約，引呢位31歲意大利國腳加盟，絕對係好條件。安歷卡拍杜奧巴定阿馬利，都算係亞洲球會數一數二嘅鋒線組合。
中超變淘金勝地
乜家陣啲中超球會咁富貴，除咗申花之外，升班馬大連阿爾濱野心都唔細，除咗睇中杜奧巴，據講亦有意羅致迪亞高米列圖。
上屆冠軍廣州恒大有背後地產財團大水喉射住，先可以廣收天下兵器。申花老闆朱駿靠電腦網路生意發達，中國越嚟越多人玩online-game，難怪豬籠入水。
至於2009年先成立既大連阿爾濱，好多人都唔知係乜料，阿爾濱過去兩年連續贏中乙同中甲冠軍，球隊由搞房地產同建築工程嘅集團支持，自然可以財大氣粗。
據講，來季中超16隊波嘅預算總計有成28億人仔，中超隨時變咗世界球星另一個淘金勝地。