仙道彬：能夠成為最年輕的常規賽MVP，D.Rose點都係最勁控衞啦？
牽牛：佢成為MVP我同意，但最勁控衞就有保留喇！
利司基：佢打法似SG多過PG……如果真係傳統控衞，我選CP3或Rondo。
金鍀：我認為那些年MVP，如尼殊都可以幫隊友一把，路斯齋自己勁，隊友就廢晒咁。
牽牛：要提那些年，點少得傑特，真係細細個就聽過佢個名啦！
仙道彬：咁你不如話MagicJohnson，未出世都聽過佢個名啦！
牽牛：你話我老餅都係咁話，Magic、傑特、尼殊呢啲傳球行先嘅，先稱得上係好控衞。
金鍀：唉，但傑特年少之時，MVP之爭，輸咗畀鄧肯呢，好彩家攞番個總冠軍。
仙道彬：我都認同牽牛，新一代PG真係得分第一，懶理隊友，你睇韋斯卜克就知啦！
利司基：唔係佢，Thunder會出局？！
金鍀：控衞得唔得，實際啲睇，睇助攻同失誤比率，韋斯卜克失誤太多，路斯都唔少，只係球迷俾佢華麗轉身呃咗。
牽牛：反而CP3較傳統，交波又好，不過加盟湖人不成，最後去咗快艇，就算有比立斯同比歷克格芬傍住，都要時間適應啩！
利司基：湖人未來25年，好似有機會每年收兩億美金轉播費，估唔到有無限金錢都買唔到心頭好。
金鍀：咪多得史坦大人囉！
仙道彬：我寧願湖人一口氣買尼殊+希爾，等兩老臨退休贏番次總冠軍。
金鍀：正！真係賣飛佛！
牽牛：不過我又驚好似當年奧尼爾、拜恩、馬龍同披頓翻版，結果都係得個桔。
仙道彬：揭幕戰就係公牛對湖人，可以睇吓D.Rose點同Kobe單挑啦！
利司基：公牛唔加強進攻嘅話，應該都係Kobe贏㗎啦。
仙道彬：講多無謂，大家等聖誕開波啦！