令陳冠希事業、品味皆插水的16歲慾照學生妹謝芷蕙（Cammi），昨日自慾照事件後首次出席活動，可惜全程慘被狂玩，跟她猶如餅印的張學潤（NelNel）更與莊思敏輪流狂寸她。不過當三人合照時，卻發現他們離奇地相似。
莊思敏、張學潤及謝芷蕙等昨於西九龍出席onlinegame活動，同場還有爆乳超蓮Iris及Monna以cosplay造型示人。爆出與陳冠希的慾照事件後，昨日Cammi首次出席公開活動，她甫出場司儀即問眾嘉賓可有勸諫說話予她？莊思敏即說：「以後生生性性啦！」
張學潤代講好話
在遊戲環節，NelNel見Cammi抽中與一名15歲現場觀眾合作時，亦忍不住說：「呢啲年紀咪啱你囉！」在台上莊思敏刻意避與Cammi合照，即使司儀拉攏，她亦要找NelNel隔在中間先肯影，不過三人合照時，卻離奇地發現原來莊思敏跟二人似樣！說到於台上狂寸Cammi一事，莊思敏說：「我衰好奇，今日出席呢個活動，都係想睇吓佢（Cammi）真人同阿Nel有幾似，見完真係覺得自己入咗Pandora世界咁！」
莊思敏跟NelNel異口同聲指Cammi應多讀幾年書才工作，NelNel說：「做娛樂圈都需要有墨水有內涵，先可以做得長！」雖然勁寸Cammi，不過NelNel仍為她求情：「同佢傾過偈，其實佢好天真，唔似咁有機心，件事都咁耐喇，大家畀個機會佢放過佢，我叫咗佢以後要帶眼識男仔，唔好咁易被男仔呃。」問NelNel可有意跟Cammi上契？他謂：「唔使咁嚴重呀！佢要我幫手咪搵我囉！我好鍾意幫新人！」
Cammi否認出書
說到陳冠希早前於台灣受訪時，直言跟Cammi拍拖是太笨，對此Cammi說：「都過咗咁耐，唔想再提，我唔會唔開心。」問是否出書講情史？Cammi說：「唔明點解有咁嘅講法，我唔會出書講情史。」至於聖誕Cammi則表示已約了女友人慶祝。
採訪、攝影：譚倩宜