日前「蘋果」老總沙膽虹評論選委會選舉結果，指民望甚高的梁振英在選委會選舉中得不到廣泛支持，凸顯了小圈子選舉的荒謬性。
沙膽虹有所不知，梁生在一般民意調查中，受支持度較好，主要係因為梁生講說話有條理，侃侃道來，識得背書咁，而且對專題（特別係房屋）嘅數字滾瓜爛熟，可衝口而出，十足內地高層幹部咁能言善道。一般人在電視鏡頭前公開場合見到，好容易就拍爛手掌，好感油然而生，於是俾調查員問到，就會話梁生呀，好！至於一般市民對梁生嘅深層認識有幾多，冇人敢講，情形就好似二○○八年美國總統大選，美國人經過八年小布殊管治，對共和黨好反感，睇見布殊就憎（現在一些香港人對曾蔭權團隊亦開始有如是觀感），碰啱共和黨選咗位老人家麥凱因出嚟，而對律師出身，具地區社工工作經驗嘅奧巴馬，共和黨想唔輸都幾難。奧巴馬口才及演講冇得頂，梁生有排學，但奧巴馬做過四年參議員，對政府管治經驗全無，上台後做成點呀，成個卡達總統咁款，現時民望只有43%，衰過我地曾先生，好唔過小布殊。
至於小圈子又點？選委會選民以功能組別區分，有二十四萬人左右，包含所有香港專業精英（大律師、律師、會計師、醫生、工程師、測量師、教師、教授、校董、社工、IT人，以及工商界，銀行金融界，出版商、行政立法議員、區議員等等等），人數雖然比較少，但教育程度屬全港最高嗰一批，佢地投票嘅結果可以反映出兩大形勢：（一）支持唐生的選委佔多；（二）支持泛民的選委勝出率極高，亦即係反映，梁振英先生嘅普通市民民意支持雖然夠高（四十幾巴仙），但在香港精英之中，梁生嘅支持率最低！梁生做特首嘅機會打咗一個折扣，但以美國選舉文化睇，Mr.Leungisdown,butnotout，仍有機會入閘爭過，至於唐生咯喎，如果佢得選委支持做咗特首，擊敗梁、何或馮嘅話，當然唔算冇代表性。