紐卡素前晚喺英超主場同史雲斯打成0:0，賽前佢哋為上月離世嘅威爾斯國家隊領隊史必，舉行簡單追思會，悼念呢位曾經喺紐記效力6年嘅名將。史必父母同佢兩個小朋友喺紐記名宿舒利亞陪同下進場，史必遺孀露薏絲就坐喺觀眾席；之後全場球迷起立鼓掌，仲高舉印有11號（史必效紐記時嘅號碼）嘅白色紙牌，史必母親仲認唔住挨落舒利亞度喊（圖），場面感人。