千呼萬喚，《基金管理公司及證券公司人民幣合格境外機構投資者（RQFII）境內證券投資試點辦法》上周五出台。唔少內地券商同基金公司都喺香港設立子公司，請晒人，做好計劃書，等內地相關部門一出試點辦法就即刻遞申請，終於畀佢哋等到呢一日。
今朝中證監交表
華華聽聞，試點辦法上周五出台，唔少券商同基金公司要員，過去兩日都要返工，執好申請表同計劃書，然後趕去機場飛北京，準備今朝早就到中證監交表。雖然唔係先到先得，但執輸行頭慘過敗家嘛！
根據試點辦法，券商同基金公司要先向中證監申請，60日內知道批定唔批，批咗之後再去外管局申請投資額度，大家最關心可以分到幾多額度，事關試點只有200億人仔，市場傳聞，中證監只會批10至20間公司做RQFII，平分嘅話，每間只得10億至20億人仔投資額度，話咁快就用晒。