【本報訊】曾參與乒乓外交的乒乓名將郭毅萍，其3歲孫兒郭毅上周入住聖保祿醫院，父母信賴私院服務，怎料院方未得家長同意，便擅自從病房帶走郭毅去抽血，嚇得小朋友泣不成聲，醫院主管事後未有合理解釋，揚言「要投訴隨便你」。郭毅母親怒斥院方不負責任：「咁你拎咗我個仔去劏都得㗎啦！」記者：袁慧妍、陳沛冰
郭母昨表示，兒子郭毅本月12日因患手足口病入住聖保祿醫院接受診治，於15日出院，費用逾兩萬元，「一直去開聖保祿，諗住私院質素好啲」。出院當日早上9時許，醫護人員曾替郭毅抽血化驗，其後郭毅及郭母留在兒科病科等候化驗結果。三個多小時後，郭母外出購買午膳，吩咐工人留在病房照顧兒子，未幾有護士走入病房帶走兒子，「個姑娘冇講低咩事，個仔返嚟就喊到收唔到聲，之後個姑娘先同個工人講，話再抽多咗一次血」。
女主管︰要投訴隨便你
郭母回來後驚見兒子左手多了一個針孔傷口，即向病房護士查詢，但護士表示不知情，「點解病房護士可以唔知發生咩事？咁街外人帶走我個仔都得啦」。其後有護士指「化驗室要求再抽血驗」，但沒解釋原因。郭母說：「佢哋冇得到我同意，有乜理由私自帶走我個仔去抽血？四個鐘頭之內抽兩次血，大人都會見暈，何況係小朋友？」
郭母與院方一名姓徐女主管理論，她引述該名主管指醫護人員已知會家屬，但她不認同：「工人唔係家屬，先斬後奏幫我個仔抽血，咁唔係叫知會。」郭母要求主管就事件詳細解釋及道歉，豈料該名主管竟說「要投訴隨便你」，說罷不理逕行離開。郭母再向院方一名姓羅經理投訴，羅答應會跟進。
家屬指院長包庇下屬
記者昨日所見，郭毅的手臂上留下兩個針孔，並有少許瘀血。被問到父母不在場時遭醫護人員帶走抽血是否驚怕，郭毅用力點一點頭，並立即把衣袖拉下遮蓋傷口。郭母說︰「個仔嗰日喊到眼都腫晒，捽到隻眼附近都爆晒微絲血管。」她怒斥聖保祿醫院不負責任，「所有嘢都應該有程序，叫個主管解釋佢就咁嘅態度，咁大間醫院唔應該咁做嘢」。
郭毅父親郭星表示，曾向院長投訴，但至今未獲回覆，故他打算向衞生署投訴：「根本就係（管理層）包庇下屬，仲要咁嘅態度，我對佢哋冇信心，唔會再去（聖保祿）。」對於郭家的投訴，聖保祿醫院昨表示暫未有回應。