選委會選舉結束後，一啲傳媒為梁振英擔心，驚住佢搵唔齊一百五十個選委提名，一張報紙仲發表社論，要求選委要確保有競爭㖭，真係皇帝唔急太監急，若左丁山估計冇錯，梁振英一定可以入閘，一千二百名選委中，你估冇梁生好友乎，唔駛揚開肚皮俾記者睇呀，傳媒何須為佢憂慮！支持唐營嘅選委大都順利選出，乃意料中事，工業界、紡織界、商會界以至餐飲零售界盡是唐旅得勝，唐英年入閘全無問題，但是否可以順利登上特首之位，仍待觀察。提名時有票，投票時無票，一九九七年就曾發生過，未到最後點算，無人敢肯定下任特首姓梁還是姓唐，不過肯定唔會姓何或者姓馮。
泛民一舉奪得選委會205席，佔選委會17%席位，可以話係大勝，但亦為泛民帶來難題，點解呢？泛民在一人一票選舉制度下之區議會選舉大敗，而民建聯工聯會大勝，證明民建聯及工聯會更貼近羣眾，動員能力更強，今日即使如泛民所願進行雙普選，泛民能否取得勝利，是一個大疑問。呢，竟然在小圈子，中產專業人士投票底下，泛民可以橫掃教育界、高等教育界、IT界、法律界及社會福利界嘅選委。這是甚麼意思呀？左丁山認為係中產專業精英幾維護民主理念，支持泛民，佢地一致投票後，選泛民候選人入選委會，但在區議會選舉下，呢批中產根本只是市民羣眾中之少數，於是泛民選票不敵民建聯、工聯會。
咁講法，泛民口口聲聲要求廢除功能組別，廢除小圈子選舉，豈非拆自己台？如果中央將計就計，就廢除功能組別，泛民可能會更驚青，恐怕會輸到一鋪清袋喎。
呢種政治弔詭，十分巧妙神秘，非左丁山所能理解，有待選舉專家如蔡子強去拆局。最可笑嘅，就係有人過去不支持一人一票，維護小圈子，今次就第一時間衝出嚟話民意不可違，小圈子選舉不合民情！好呀，民主黨不如亦以第一時間請佢加入，一齊爭取民主普選啦！