會睇這篇文的人有三種：一是陸東粉絲；二是唔妥陸東的人；三是陸東本人（如果佢睇《蘋果》的話）。股榮五年前開始寫大市新聞，睇大行報告，印象最深刻的，是每逢有陸東訪問或消息，無論放喺B1或B10簡訊，都是票房收視保證，事後更有陸東效應，新貼股份都有不錯短炒空間。
三大因素顯睇市威力
慣性收視一直持續到今年，一份本地財經雜誌，由去年11月13日至上周六，60期封面故事竟有7期以陸東為題材，能樂此不疲，答案只得一個：陸東可以sell紙。究竟陸東緣何有如此威力，答案可歸納為三點。
（一）Timing準到爆。陸東三年前自立門戶，由瑞銀分析員轉為基金經理，但一切成功實有賴過去準繩分析，01至03年連續三屆被選為香港冠軍分析員，並非浪得虛名，亦建立一批長期捧場客。
陸東一向被外界稱為港股大好友，但令我印象最深的，反而是07年10月31日一份預警報告，指大市估值貴，未來有機會大調整，回吐幅度達3000至4000點。出報告前一日，恒指升至31958點歷史新高，大牛市唱淡，需要有更大勇氣guts。報告出街後8個交易日，港股累跌3700點，一份報告贏盡掌聲。
（二）寸得起、駁得番。聽過陸東演講的朋友會知道，佢係一個非常好的講者。能將沉悶艱澀理論轉化為人語，分析有points，加上幽默抵死暗寸，聽者過癮。作為分析員，不可能逢估必中，間中亦會失手，但陸東都可以用大條道理過關。
今年市況不濟，信奉價值投資的他歸咎於「今年係價值投資陷阱，唔只我哋，清海（惠理謝清海）都係，表現都好差，因為啲嘢由好平變成非常平。」拖埋謝清海落水，我無話可說。根據彭博資料，今年頭11個月，陸東旗下基金蝕23.3%，自09年5月成立至今回報0.79%。同期港股表現分別為跌22%及升16%，是否收貨，留待讀者自己判斷。
（三）物以罕為貴。正如陸東話齋，坊間充斥着財演，今日睇好明日看淡，今日估低收明天話高開，忙完到頭來散戶輸錢、經紀發達。或者投資者已經厭倦這類黃大仙即食文化，陸東從不估即市短線，問佢佢會叫你問「三五六七叔」。物以罕為貴，每次開金口，自然唔睇都望吓。
由分析員（SellSide）轉戰至操盤員（BuySide），感覺上身份轉換已令到陸東言論分析準確度大為降低，翻睇過去一年共7期陸東訪問，內容大致上「我正在買貨」、「仍是牛二，買股良機」、「再度入市」、「合理值25800」，基金經理唱好大市，我完全理解。
股榮
