港股於萬八關邊緣垂死反彈，似係跌穿升軌後的「後抽」，本周再跌機會甚大。每逢12月，市場都憧憬基金整靚盤數，炒起個市，但今年基金慘蝕已成定局，輸30%同28%有幾大分別？倒不如沽盡啲，攞番啲Cash，等出年再博過！魏力估計，年底前大市尋底機會頗高。
本欄上周五推介富士康（2038）急升3.2%，收報4.88元，走勢靚仔，但力水唔多夠，睇埋今日，升唔穿5蚊要走咗先。人仔趨跌，出口股有着數之餘，部份航運股亦有甜頭，東方海外（316）收入以美元計數，有滙兌收益幫補吓，盤數應該冇咁傷。
管理層早前直言「明年行業前景唔樂觀」，並削減歐洲航線運力兩成，以節省成本。公司唱淡自己，但股份反其道而行，12月累彈逾兩成，跑贏大市幾條街。德銀仲出報告唱好，話明年首季係「全球海運最壞的時刻」，由於股市行先經濟半年左右，家陣係收集航運股最佳時機，而東方海外管理層優秀，值得加分㖭！
睇埋幅圖，股價近月以「圓底」炒上，上周大成交突破40蚊阻力後，繼續沿保歷加通道頂部上衝，MACD雙牛擴大，上周五再升1.2%，報41.50元，向上先睇46蚊阻力區，跌穿39蚊止蝕。
魏力