港交所（388）推行港股加時，業界怨聲載道。不過，正正因為呢單嘢，令到幾個業界組織阿頭成日聚頭，越嚟越團結，除咗定期食飯開會，華華收到風，七大經紀業組織明年再接再厲，一齊搞新春酒會，仲打算請埋幾位特首參選人到場。
港交所開新春酒會
聽聞七大經紀業組織暫定明年2月16日，喺港交所展覽廳搞新春酒會，貪嗰度容易聚腳。佢哋仲已經請咗財經事務及庫務局局長陳家強做主禮嘉賓。適逢特首選戰如火如荼，金融服務界手執18票，有18位選委，佢哋都希望爭取更多機會見吓幾位特首參選人，所以新春酒會都預埋佢哋。
講開又講，華華聽聞唔少金融服務界嘅選委認為，唐唐同CY至今都冇乜提到有關對證券業嘅意見，唔知兩位參選人會唔會為咗呢18票惡補一吓？