上星期五早段個市悶到喊，點知下晝突然傳出人行會再減準備金，又話匯金下周一（即係今日）會入市掃四大內銀，兩地股市即刻動起來，滬綜指三扒兩撥去番2200點樓上，港股亦升逾1%，叫做有番氣勢。
不過，升市還升市，唐牛對於匯金事先張揚掃貨呢個傳聞好有保留，匯金掃貨向來數以千萬股計，如果講明幾月幾日買貨，大家肯定會做春江鴨入定貨，然後排定沽盤派畀匯金，咁咪即係穩賺不賠？會唔會太過着數呢？阿爺又會唔會咁做呢？事實上，睇番Trackrecord，匯金通常都係入市後至公佈，唐牛從陰謀論角度睇，似係有心人趁個市買賣兩閒時，發放所謂「好消息」，然後乘勢推個市上去再獲利。
由於消息尚未得到證實，內銀股今日隨時打回原形，所以戰友們下次再聽到呢啲傳聞時，自己都要消化一下先，寧願遲少少出手買貴幾格，都好過無啦啦坐艇。
唐牛