中國決定對美國進口排氣量2.5升以上嘅小轎車同越野車，徵收反傾銷稅同反補貼稅，反映咗幾件事，一、中央認為中國自家品牌汽車業進入困難局面；二、中國人越嚟越有錢，但最貼身嘅健康產品如奶粉，同高檔嘅奢侈品如手袋、手錶之類，都會揀返海外名牌，為中國自有品牌帶嚟劇烈競爭。
中國內需行業面對嘅挑戰越嚟越大，同時低增值工業又面對其他新興市場競爭，雖然中國高增值工業嘅低成本、高效率喺全球無可取代，但歐洲需求肯定放緩，美國經濟小陽春唔似可以長期維持，所以中國未來好難保持高速增長，長遠「保八」似乎要靠政府大幅投資基建。
睇近期內需股同高端消費股遠遠跑輸鐵路基建同電訊設備股，就知投資者發現內地經濟中期增長動力，再次轉向政府投資方面。
要數政府仲較有空間投資嘅行業不離電訊業，因為中移動（941）未來將大舉投資TD-LTE（4G）業務。電訊設備股當中，本欄之前推介過中興通訊（763），另一隻較大路嘅選擇係京信通信（2342）。
京信業務分為無線優化業務、天線及子系統業務，產品主要供電訊網絡接收之用，前幾年受惠2G升級3G網絡，盈利爆升，但3G投資期已過，今年上半年收入只增27%至25.5億元，純利升13.7%至3.17億元，其中大客中移動佔收入比重進一步升至57%，來自聯通（762）同中電信（728）嘅收入比重就減少。
電訊投資受惠保八
未來中移動要投資LTE，有機會為京信帶嚟新一輪增長，但明年未必可以受惠，始終京信嘅產品係電訊網絡基建供應鏈嘅較下游部份，收成要等一段時間，不過未來增長都幾穩陣。
公司預測2011年市盈率11.3倍，相信因為個市差先有咁低嘅估值。京信12月高位7.38元，上周五收6.62元，調整咗一成，算係電訊設備股中回得較快，短期內有機會追落後。中長線方面，即使歐債問題惡化，股市再出現拋售潮，相信京信喺5元都應該有支持，搵位低吸要有耐性，中長線市盈率上返去16倍並唔過份，以2011年市盈率計算，即係9蚊左右。
晉佳
本欄逢周一、三及五刊出