荷李活巨星湯告魯斯（TomCruise）和妻子姬蒂荷姆絲（KatieHolmes）一向被指寵壞女兒Suri，前日姬蒂終自食其果，在紐約玩具店內硬食Suri的臭脾氣，因囡囡扭計喪喊，令教女無方的姬蒂在大庭廣眾出醜！
現年5歲多的Suri是靚佬湯夫婦的掌上明珠，呼風喚雨要乜有乜，幾歲大人仔仍嚷着要用奶樽，兩夫婦都沒有耍手擰頭，更滿足貪靚囡囡的願望，任她買靚衫穿高踭鞋，終令Suri小小年紀已患上公主病。
波板糖番
前日姬蒂帶Suri到紐約的FAOSchwarz玩具店掃貨，本來戴頭箍、穿粉紅色裙仔的Suri勁開心，在玩具店內雙眼發光跳跳紮，但後來不知何故突然公主病發，Suri在眾目睽睽下扁嘴扭計放聲大哭！
店內其他顧客即望向姬蒂母女的方向，令姬蒂勁尷尬，但Suri唔肯收聲繼續喊，無晒符的姬蒂惟有出絕招，拿出波板糖和玩具，Suri見到即刻破涕為笑。
翌日姬蒂母女再次扮靚靚出巡，身旁還多了一家之主靚佬湯，原來他忙完在世界各地宣傳新片《職業特工隊：鬼影約章》（Mission：Impossible-GhostProtocol）後，已坐直升機飛返紐約交人，與妻女共享天倫。
望實BB車
Suri跟父母出街時已變回乖巧，靚佬湯可能未知囡囡在玩具店發脾四，繼續溺愛囡囡，幫她拎手袋毛公仔不特止，當穿高踭鞋的Suri呻行到腳攰時，靚佬湯即張開手抱抱，任由她變樹熊。靚佬湯又帶她行花店，其間有人推BB車經過，Suri即大感興趣捉實老竇停低望，似乎想要弟妹，而姬蒂則沿途用即影即有相機幫Suri影靚相。
此外，有指Suri已寫了一封信給聖誕老人，開出清單要求值約78萬港元的聖誕禮物，首個願望是希望收到一匹馬仔，事關盛傳靚佬湯已在比華利山寓所附近買了馬房，只欠馬仔。